Отбасы банк зейнетақы жинағының артық бөлігін стоматологиялық қызметке пайдалану бойынша өтінім қабылдауды уақытша тоқтататынын мәлімдеді, деп хабарлайды LS. Бұл туралы банк ресми түрде хабарлады .
“2025 жылғы 15 қыркүйектен бастап enpf-otbasy.kz платформасында тіс емдеуге байланысты өтінімдер қабылданбайды. Ал осы күнге дейін берілген өтінімдер әдеттегі тәртіппен қаралады”, — делінген хабарламада.
Зейнетақы жинағының бір бөлігін тіс емдеуге пайдалану өтінімдерін қайта қабылдау мерзімі туралы банк қосымша ақпарат береді.
2025 жылғы қыркүйектегі мәліметке сүйенсек, БЖЗҚ-дан тұрғын үй жағдайын жақсартуға – 4,1 трлн теңге, емделуге – 888 млрд теңге жұмсалған. Сондай-ақ, 87 млрд теңге жеке инвестициялық компаниялардың сенімгерлік басқаруына берілген.
Бұған дейін Қаржы мониторингі агенттігі қазақстандықтардың БЖЗҚ-дан тіс емдеуге жалған құжат рәсімдеу арқылы 200 млрд теңге алғанын мәлімдеген еді.